Օրենսդրական նոր փոփոխությամբ ընդլայնվել է այն բուժհաստատությունների ցանկը, որոնք կարող են ծննդալուծել ՄԻԱՎ-ի դրական կարգավիճակ ունեցող հղիներին։

Հրամայական էր առաջացել իրականացնելու համապարփակ վերապատրաստումներ բուժհաստատությունների անձնակազմի շրջանում՝ բարելավելու ՄԻԱՎ-ի վերաբերյալ ընդհանուր գիտելիքները, բարձրացնելու մորից երեխային ՄԻԱՎ-ի փոխանցման կանխարգելման թեմայի վերաբերյալ իրազեկվածության մակարդակն ու ևս մեկ անգամ ընդգծելու ՄԻԱՎ-ով ապրող մարդկանց նկատմամբ խարանի և խտրականության կանխարգելման կարևորությունը։

Դասընթացի մասնակիցներն ուսումնասիրել են մի շարք թեմաներ, ինչպիսիք են․

ՄԻԱՎ/ՁԻԱՀ-ի համաճարակաբանությունը, պատճառագիտությունը, կենսական ցիկլը,

համաճարակաբանական իրավիճակը Հայաստանում,

հղիների շրջանում ՄԻԱՎ-ի վերաբերյալ թեստավորումը, ՄԻԱՎ վարակի ախտորոշումը,

ՄԻԱՎ վարակի կլինիկական ընթացքը,

օպորտունիստական հիվանդություններն ու բուժման սկզբունքները,

մորից` երեխային ՄԻԱՎ վարակի փոխանցման կանխարգելումը,

ՄԻԱՎ-ով մարդկանց նկատմամբ խարանի և խտրականության կանխարգելումը,

ՄԻԱՎ կարգավիճակի գաղտնիությունը և այլն։

Առանձնահատուկ անդրադարձ է կատարվել նաև ՄԻԱՎ-ի կանխարգելմանն ու այդ նպատակով մեր երկրում անցկացվող միջոցառումներին։

Դասընթացները վարել են ԻՀԱԿ համաճարակաբանական հսկողության և խորհրդատվության բաժնի վարիչ Վարդան Արզաքանյանը, ամբուլատոր կլինիկայի ղեկավար Հերմինե Հովակիմյանը, լաբորատոր ախտորոշման ծառայության ղեկավար Թամարա Հովսեփյանը, ամբուլատոր կլինիկայի բժիշկ-վարակաբան Յուլյա Մանուկյանը, հրավիրյալ բանախոս Հայարփի Սահակյանը։

Դասընթացները կազմակերպել և իրականացրել է ԻՀԱԿ՝ Գլոբալ հիմնադրամի «Հայաստանի Հանրապետությունում ՄԻԱՎ/ՁԻԱՀ-ի դեմ պայքարի ազգային ծրագրին աջակցություն» դրամաշնորհային ծրագրի թիմը՝ ղեկավար Զարուհի Գրիգորյանի գլխավորությամբ։

Ինֆեկցիոն հիվանդությունների ազգային կենտրոնը միշտ պատրաստակամ է նախաձեռնողականություն դրսևորելու և տարիների ընթացքում կուտակած փորձն ու գիտելիքները գործընկերներին փոխանցելու, հետևաբար նմանատիպ նախաձեռնությունները մեր կենտրոնում շարունակական բնույթ են կրելու։