ԿԱՅՔԸ ՄՇԱԿՄԱՆ ՓՈՒԼՈՒՄ Է

Ավելին

Ողջույնի խոսք

Հարգելի՛ հայրենակիցներ, 

բարի գալուստ Ինֆեկցիոն հիվանդությունների ազգային կենտրոնի պաշտոնական կայքէջ:

Շուրջ երկու տարի է՝ «Նորք» ինֆեկցիոն կլինիկական հիվանդանոցն ու ՁԻԱՀ-ի կանխարգելման հանրապետական կենտրոնը գործում են որպես մեկ կառույց:
Այս կարճ ընթացքում, սակայն, ազգային կենտրոնը հասցրել է մեկտեղել երկու նախկին կառույցների բազմամյա փորձն ու գիտելիքները՝ հանրությանն առավել համապարփակ և արդյունավետ բուժօգնություն ցուցաբերելու համար:

Սրանով, սակայն, մեր անելիքները չեն սահմանափակվում:
Երկու տարի անց Ինֆեկցիոն հիվանդությունների ազգային կենտրոնն իր այցելուներին կընդունի առավել հարմարավետ, արդի սարք-սարքավորումներով հագեցած և հիմնովին վերակառուցված ու վերանորոգված նոր մասնաշենքում՝ մատուցելու ավելի որակյալ, միջազգային նմանատիպ կենտրոններին չզիջող բժշկական ծառայութուններ:

Մինչ այդ ազգային կենտրոնը գործում է շուրջօրյա ռեժիմով՝ շարունակելով մատուցել իր ծառայություններն ամբողջապես և ողջ ծավալով՝ ապահովելով մեր հայրենակիցների լիարժեք բուժսպասարկումն ու բուժօգնությունը: Մեր փորձառու բժիշկները տարբեր վերապատրաստումների, միջազգային փորձի փոխանակման շնորհիվ հարստացնում են իրենց գիտելիքները՝ մեր քաղաքացիների բուժսպասարկումն առավել արդյունավետ իրականացնելու համար:

Վերջին տարիները մեր բուժանձնակազմի համար եղել են բարդ ու մարտահրավերներով լի, բայց բժիշկների ամենօրյա անտրտունջ և հոգատար աշխատանքի շնորհիվ բազմաթիվ մարդկային կյանքեր են փրկվել ու փրկվելու:

Շնորհակալ ենք, որ գնահատում եք այդ աշխատանքը, բայց միասին պետք է անենք հնարավորը՝ նախևառաջ կանխարգելելու ինֆեկցիոն հիվանդությունների տարածումը՝ մեր գիտակից ու գիտելիքահեն որոշումների արդյունքում:

Կենտրոնը ևս ջանք չի խնայում՝ տարբեր միջոցառումների օգնությամբ ձեզ մատուցելու գիտականորեն ապացուցված տեղեկություններ՝ հիվանդությունների կանխարգելման մեթոդների և առողջ ապրելակերպի մասին: Ինֆեկցիոն հիվանդությունների ազգային կենտրոնի պաշտոնական կայքն էլ այդ հարթակներից մեկն է, որտեղ կարող եք ոչ միայն ծանոթանալ հիվանդանոցի գործունեությանը, մատուցվող ծառայություններին և առաջիկա ծրագրերին, այլև հանրամատչելի ձևով ստանալ ձեզ անհրաժեշտ բժշկական ինֆորմացիան:
Առողջ հասարակությունը զարգացող պետության կարևոր գրավականներից է, որին հասնելու համար անհրաժեշտ է յուրաքանչյուրիս ջանքը:

Հարգանքով՝
Ինֆեկցիոն հիվանդությունների ազգային կենտրոնի տնօրենի ժ/պ
Ստեփան Աթոյան

Առողջապահություն

Աշխատակազմ

Կենտրոնի կառուցվածք

Բաժիններ և բաժանմունքներ

Պացիենտ

Մենք համագործակցում ենք