Ի՞նչ բարդություններ է առաջացնում հեպատիտ Ց-ն․ Լենա Նազարյան

Շարունակելով վիրուսային #հեպատիտներ-ի մասին իրազեկման շարքը՝ այս անգամ կանդրադառնանք հեպատիտ Ց-ի ախտանշաններին։

Մինչ այդ՝ կարևոր հիշեցում՝ մարտի 1-ին մեր կենտրոնի շարժական բուժախտորոշիչ կլինիկան տեղակայված է լինելու Ազատության հրապարակում։ Կարող եք ԱՆՎՃԱՐ և ԱՆԱՆՈՒՆ հետազոտվել նաև հեպատիտ Ց-ի և Բ-ի վերաբերյալ (մանրամասները՝ //surl.li/rabwo ):

Իսկ հեպատիտ Ց-ի ախտանշանները կներկայացնի ԻՀԱԿ մեծահասակների ինֆեկցիոն բաժանմունքի բժիշկ-վարակաբան Լենա Նազարյանը։

Հեպատիտ Ց-ի սուր ընթացքի դեպքում պացինետների մոտ կարող են դիտվել հիվանդության տիպիկ ախտանաշաններ՝

• մաշկի դեղնություն,

• ջերմության բարձրացում,

• սրտխառնոց,

• փսխում,

• ախորժակի բացակայություն,

• մեզի մգացում,

• կղանքի գունազրկում:

Նշված գանգատների շնորհիվ այս փուլում հնարավոր է հիվանդությունը ժամանակին ախտորոշել և կանխարգելել բարդությունները։ Սուր վիրուսային հեպատիտի դեպքում որպես բարդություն կարող է զարգանալ սուր լյարդային անբավարարություն։

Քրոնիկական վիրուսային հեպատիտին բնորոշ են ինչպես անախտանիշ ընթացքը, այնպես էլ ամենաբազմազան լյարդային և արտալյարդային դրսևորումներ՝

• թուլություն,

• հոգնածություն,

• մաշկի, նյարդային, սիրտանոթային համակարգերի ախտահարում։

Հեպատիտ Ց-ի անախտանիշ ընթացքի պատճառով հիվանդությունը հիմնականում ախտորոշվում է ուշ փուլերում, երբ արդեն առաջանում են լյարդի հյուսվածքի անդարձելի փոփոխություններ՝ լյարդի ցիռոզ, լյարդի առաջնային ուռուցք (hեպատոցելյուլյար կարցինոմա)։

Լյարդի ցիռոզին բնորոշ է՝

• որովայնի չափերի մեծացում (ասցիտ),

• տարբեր տեղակայման այտուցներ,

• մաշկի դեղնություն,

• արյունազեղումներ մաշկին,

• մաշկի քոր,

• մեզի մգացում,

• անքնություն,

• արյունահոսություն (քթից, լնդերից, հետանցքից, կերակրափողի լայնացած երակներից)։

Սքրինիգային հետազոտությունների շնորհիվ հիվանդության վաղ փուլերում հայտնաբերումը և լիարժեք բուժումը թույլ են տալիս խուսափել կյանքին վտանգ սպառնացող բարդությունների զարգացումից։