Տուբերկուլոզը ՄԻԱՎ վարակով անձանց մոտ
ՄԻԱՎ վարակով անձանց մոտ իմունային անբավարարության զարգացման հետ մեկտեղ սկսում են միանալ և/կամ ակտիվանալ տարբեր վարակներ և այլ երկրորդային հիվանդություններ: Տուբերկուլոզը ՄԻԱՎ վարակով անձանց շրջանում ամենատարածված օպորտունիստական վարակներից է և մահվան հիմնական պատճառներից է (30%)։ Տուբերկուլոզով հնարավոր է հիվանդանալ ՄԻԱՎ վարակի ցանկացած փուլում, ինչը բարդացնում է երկու վարակների ընթացքն ու բուժումը: ՄԻԱՎ վարակով անձանց շրջանում տուբերկուլոզը ծանր ընթացք է ունենում և հանգեցնում է հիվանդության բարդացման և խորացման, ինչի պատճառը իմունային համակարգի անբավարարությունն է։ ՄԻԱՎ վարակը տուբերկուլոզի զարգացման ամենահզոր ռիսկի գործոնն է։ ՄԻԱՎ վարակով անձանց շրջանում 15-22 անգամ բարձր է ակտիվ ՏԲ-ի զարգացման վտանգը՝ ՄԻԱՎ չունեցող անձանց համեմատ: Այդ պատճառով տուբերկուլոզն ախտորոշելու դեպքում պացիենտին անհրաժեշտ է հետազոտել նաև ՄԻԱՎ-ի վերաբերյալ և հակառակը՝ ՄԻԱՎ վարակով անձին անհրաժեշտ է դիտարկել որպես տուբերկուլոզով պոտենցիալ հիվանդ և կազմակերպել անհրաժեշտ հետազոտությունները տուբերկուլոզը ախտորոշելու համար։
ՏԲ-ի թոքային ձևը ՄԻԱՎ վարակով անձանց շրջանում ՏԲ-ի առավել տարածված ձևերից է։ Իմունային անբավարարության խորացմանը զուգընթաց բարձրանում է արտաթոքային ՏԲ-ի (ավշային հանգույցների, կենտրոնական նյարդային համակարգի, միզասեռական օրգանների, որովայնի խոռոչի օրգանների, ողնաշարի, մաշկի և այլն) զարգացման հավանակությունը։
ՄԻԱՎ վարակով պացիենտների շրջանում տուբերկուլոզի հիմնական ախտանշաններն են.
ՄԻԱՎ/ՏԲ համակցված վարակով բոլոր պացիենտներն ունեն ՄԻԱՎ վարակի և ՏԲ-ի բուժման կարիք: Առաջնահերթ է համարվում ՏԲ-ի բուժումը, որը սկսվում է ակտիվ ՏԲ-ի ախտորոշումը հաստատվելուց անմիջապես հետո: Դրանից հետո՝ հնարավորինս շուտ` առաջին 2 շաբաթվա ընթացքում, սկսվում է հակառետրովիրուսային (ՀՌՎ) բուժում: ՄԻԱՎ/ՏԲ համակցված վարակով պացիենտները պետք է գտնվեն մշտական բժշկական հսկողության տակ, հետևողականորեն կատարեն ֆթիզիատրի և վարակաբանի ցուցումները:
Շատ կարևոր է տուբերկուլոզի կանխարգելումը, որի նպատակով ՄԻԱՎ վարակով անձանց նշանակվում է քիմիականխարգելում հակատուբերկուլոզային դեղերով: Արդյունավետ ՀՌՎ բուժումը ևս մեծ դեր ունի տուբերկուլոզի կանխարգելման հարցում:
ՀՀ-ում ՄԻԱՎ վարակի և տուբերկուլոզի ախտորոշումն ու բուժումն անվճար է։