Առողջապահության նախարարությունում Հեպատիտի դեմ պայքարի համաշխարհային օրվան նվիրված մամուլի ասուլիսի շրջանակում առողջապահության նախարարի առաջին տեղակալ Լենա Նանուշյանը, Ինֆեկցիոն հիվանդությունների ազգային կենտրոնի տնօրեն Ստեփան Աթոյանը, «Քրեակատարողական բժշկության կենտրոն» ՊՈԱԿ-ի տնօրեն Կամո Մանուկյանն անդրադարձել են հիվանդության կանխարգելմանը և բուժման պետական ծրագրերին` ևս մեկ անգամ կարևորելով պատվաստումների անհրաժեշտությունն ու արդյունավետությունը։
ԻՀԱԿ տնօրեն Ստեփան Աթոյանն իր խոսքում անդրադարձել է վիրուսային հեպատիտների բուժման ծրագրերին, հիշեցրել, որ հեպատիտ Ց-ի դեղորայքը տրամադրվում է անվճար, իսկ վերջին մոտ մեկ ամսում ԻՀԱԿ-ում անվճար են
անցկացվում նաև հեպատիտ Ց-ի որակական ՊՇՌ-ն, որը հիվանդության վերջնական ախտորոշման հետազոտություն է:
ԻՀԱԿ տնօրենն ընդգծել է, որ վերջին փոփոխությունը մեծապես նպաստում է այցելությունների թվի ավելացմանն ու հետագա բուժման ընթացքի կազմակերպմանը:
Նա անդրադարձել է նաև ուղեցույցների վերանայմանը` նշելով, որ գործընթացն իրականացվում է ԱՀԿ փորձագետների հետ համատեղ՝ նպատակ ունենալով ընտրելու և մեր երկրում ներդնելու ճիշտ ու ամենաժամանակակից մոտեցումները։
ԻՀԱԿ տնօրենը հիշեցրել է, որ վիրուսային հեպատիտների և ՄԻԱՎ-ի համար հետազոտությունները կարող են անցնել ինչպես առողջության պահպանման առաջնային օղակներում, այնպես էլ կենտրոնի շարժական բուժախտորոշիչ կլինիկաներում, որոնք պարբերաբար հետազոտություններ են անցկացնում մարզերում`այդպիսով առավել հասանելի բուժսպասարկում տրամադրելով:
