Դիմել մեզ

Մի քանի փաստ հակաբիոտիկների մասին

Մի քանի փաստ հակաբիոտիկների մասին

16.03.2025
Մի քանի փաստ հակաբիոտիկների մասին

Հակաբիոտիկները միկրոօրգանիզմների կողմից սինթեզված կամ քիմիական ճանապարհով ստացված դեղեր են, որոնք շատ ցածր խտություններով դրսևորում են մանրէասպան  կամ մանրէականգ (այսինքն՝ թույլ չեն տալիս մանէրներին բազմանալ) ազդեցություն:

Հակաբիոտիկի ճիշտ ընտրությունը:

Հակաբիոտիկներ նշանակվում են պայմանական երեք տարբերակով․

Տարբերակ 1․ Անհրաժեշտ է որոշել ախտածին մանրէի տեսակը մանրէաբանական հետազոտության օգնությամբ, ինչպես օրինակ միզուղիների վարակի դեպքում հանձնում եք մեզի բակ անալիզ, այնուհետև որոշվում է մանրէի զգայնությունը հակաբիոտիկի հանդեպ և ընտրվում է համապատասխան հակաբիոտիկը:

Տարբերակ 2 ․ Գոյություն ունեն որոշ հիվանդություններ, որոնց դեպքում անհնար է/կամ անիմաստ է հակաբիոտիկների նկատմամբ զգայնություն որոշելը և նշանակվում է ստանդարտ բուժում, այսպիսի հիվանդություններ են, օրինակ, բրուցելոզը, բորելիոզը, քութեշը։

Տարբերակ 3․ Որոշ դեպքերում բժիշկը չունի հնարավորություն հստակ պարզելու՝ առկա՞ է բակտերիալ վարակ, թե՞ ոչ։ Այս դեպքերում նշանակվում է էմպիրիկ (այսինքն՝ փորձնական) հակաբակտերիալ բուժում։ Օրինակ՝ անհայտ պատճառով մեծացած լիմֆատիկ հանգույցների դեպքում նշանակվում են մինչև 2 շաբաթ տևողությամբ հակաբիոտիկներ։

Հակաբիոտիկը նշանակելուց  հաշվի են առնում նաև, թե մարմնի որ հատվածի, որ օրգանի ինֆեկցիոն հիվանդություն է պետք բուժել, քանի որ, օրինակ, միզուղիներն արդյունավետ բուժող հակաբիոտիկը կարող է բացարձակ անարդյունավետ լինել գլխուղեղի ինֆեկցիաները բուժելու համար։

Լյարդի և երիկամնների վիճակը․ հակաբիոտիկներն օրգանիզմից դուրս են բերվում կամ լյարդով, կամ երիկամներով, հետևաբար պետք է նախապես իմանալ նշված օրգանների հնարավոր հիվանդությունների մասին, նոր ընտրել հակաբիոտիկը։

Այլ դեղորայք ընդունելու հանգամանքը․ քանի որ տարբեր դեղերի հետ կարող է լինել տարբեր փոխազդեցություններ, օրինակ՝ ազիտրոմիցինի ընդունումը կոլխիցինի հետ կարող է հանգեցնել շատ լուրջ բարդությունների։

Մի քանի կարճ փաստ հակաբիոտիկների մասին

1․Հակաբիոտիկները արդյունավետ չեն գրիպի, սուր շնչառական վիրուսների և ցանկացած այլ վիրուսային հիվանդությունների ժամանակ։

2․Հակաբիոտիկներ ստանալուց առաջ հարկավոր չէ  «պրոբա»  դնել, ավելին՝ չի կարելի։

3․Հակաբիոտիկները միշտ չէ, որ պետք է խմել ուտելուց հետո, օրինակ՝ ազիտրոմիցինը պետք է խմել սոված՝ ուտելուց մեկ ժամ առաջ կամ երկու ժամ հետո։

4․ Հակաբիոտիկները տարեկան միլիոնավոր կյանքեր են փրկում, եթե ցանկանում եք, որպեսզի այս փաստը պահպանվի, ապա հետևեք բժշկի խորհուրդներին և ինքնաբուժմամբ մի՛ զբաղվեք։