Մի քանի փաստ պատվաստումների վերաբերյալ

Վերջին 50 տարիների ընթացքում պատվաստումները հնարավորություն են տվել փրկելու 154 միլիոն կյանք ամբողջ աշխարհում, ինչը համարժեք է տարվա ընթացքում յուրաքանչյուր րոպեում վեց կյանքի փրկությանը։ Փրկված կյանքերի գերակշիռ մասը՝ 101 միլիոն, բաժին է հասնում նորածիններին։
Բոլոր պատվաստանյութերից կարմրուկի դեմ պատվաստումն ունեցել է նորածնային մահացության նվազեցման վրա ամենամեծ ազդեցությունը․ իմունիզացիայի շնորհիվ փրկված կյանքերի 60%-ը բաժին է հասել հենց այս պատվաստմանը։
Վերջին 50 տարիների ընթացքում 14 հիվանդության (դիֆթերիա, B տիպի հեմոֆիլային ցուպիկ, B հեպատիտ, ճապոնական էնցեֆալիտ, կարմրուկ, A մենինգիտ, կապույտ հազ, ինվազիվ պնևմոկոկային վարակ, պոլիոմիելիտ, ռոտավիրուս, կարմրախտ, փայտացում, տուբերկուլոզ և դեղին տենդ) դեմ պատվաստումը ուղղակիորեն նպաստել է նորածնային մահացության 40%-ով նվազմանը ամբողջ աշխարհում։
Պատվաստանյութերի շնորհիվ բնական ծաղիկը լիովին վերացվել է, պոլիոմիելիտը գտնվում է վերացման եզրին, իսկ մալարիայի և արգանդի պարանոցի քաղցկեղի դեմ նոր պատվաստանյութերի մշակմամբ մենք շարունակում ենք ընդլայնել հիվանդությունների վերահսկման սահմանները։
Պոլիոմիելիտի դեմ պատվաստման արդյունքում այսօր ավելի քան 20 միլիոն մարդ կարող է քայլել, մինչդեռ հակառակ դեպքում նրանք պառալիզացված կլինեին: Ներկայումս աշխարհն արդեն կանգնած է պոլիոմիելիտի վերջնական վերացման շեմին:
Իմունիզացիայի շնորհիվ փրկված յուրաքանչյուր կյանք ապահովում է միջինը 66 տարի լիարժեք առողջ կյանք, ինչը վերջին հինգ տասնամյակներում ընդհանուր առմամբ կազմում է 10,2 միլիարդ առողջ կյանքով տարի։
1970-ականներին ամբողջ աշխարհում նորածինների մինչև 5%-ը միայն հնարավորություն ուներ ստանալու պլանային պատվաստումներ։ Ներկայումս նորածինների 84%-ը պաշտպանված է դիֆթերիայի, փայտացման և կապույտ հազի դեմ երեք դեղաչափով (ԱԿԴՍ-3), ինչը համարվում է իմունիզացիայի գլոբալ ընդգրկվածության ցուցանիշ։
Այսօր գոյություն ունեն պատվաստանյութեր, որոնք պաշտպանում են կյանքին վտանգ սպառնացող ավելի քան 30 հիվանդություններից։