Կամպիլոբակտերիոզը վարակիչ հիվանդություն է, որը հարուցվում է Campylobacter ցեղի բակտերիաներով։ Վարակի հիմնական աղբյուրը կենդանիներն են (թռչուններ, շներ, կատուներ, կովեր), որոնք կրում են հարուցիչները։

Մարդուն վարակը փոխանցվում է թերի ջերմային մշակման ենթարկված մսամթերքի (հատկապես թռչնամիս), չպաստերիզացված կաթնամթերքի, աղտոտված ջրի, կեղտոտ ձեռքերի և կենցաղային իրերի միջոցով։

Կամպիլոբակտերիոզը կարող է հանդիպել բոլոր տարիքային խմբերում, սակայն որոշ խմբեր առավել խոցելի են հիվանդության ծանր ընթացքի և բարդությունների զարգացման առումով.

•մինչև 5 տարեկան երեխաներ (ստամոքսի ցածր թթվայնության և իմունային համակարգի անբավարար հասունացման պատճառով),

•տարեցներ (≥65 տարեկան),

•իմունային անբավարարություն, քրոնիկ հիվանդություններ և իմունոսուպրեսիա առաջացնող դեղորայք ստացողներ։

Հիվանդության գաղտնի շրջանը սովորաբար 1-7 օր է և կարող է տևել 5-10 օր։

Վարակի հիմնական ախտանշաններն են․

 •փորլուծություն (հաճախ՝ արյունային կամ լորձային),

 •որովայնացավեր և կծկանքներ,

 •ջերմության բարձրացում,

 •սրտխառնոց, փսխումներ,

 •ընդհանուր թուլություն, ախորժակի կորուստ։

Հիվանդության ծանր ընթացքի դեպքում հնարավոր է ջրազրկում, հազվադեպ նաև սեպսիսի առաջացում։ Որոշ դեպքերում վարակից հետո կարող են զարգանալ հետվարակային բարդություններ՝ արթրիտ, նյարդաբանական խանգարումներ (օր.՝ Guillain-Barré համախտանիշ)։

Ախտորոշման մեթոդներն են կղանքի բակտերիաբանական քննությունը, ՊՇՌ և ELISA մեթոդները։

Բուժման հիմքում ընկած է հակաբակտերիալ թերապիան, հատկապես հիվանդության ծանր ընթացքի և ռիսկի խմբի պացիենտների շրջանում։

Հիվանդության սպեցիֆիկ կանխարգելում առկա չէ, անհրաժեշտ է խուսափել չպաստերիզացված կաթնամթերքից և ջերմային մշակման չենթարկված մսամթերքից, օգտագործել միայն մաքուր ջուր, խստորեն հետևել անձնական հիգիենային (ձեռքերը լվանալ մթերքի պատրաստումից և կենդանիների հետ շփումից հետո) և խուսափել խաչաձև վարակումից խոհանոցում (հում միսը չպետք է դիպչի պատրաստի սննդին)։